В польскім купелнім місті Криніця скончів в суботу 11-го септембра 16-ый Світовый конґрес Русинів (СКР) і 10-ый Світовый форум русиньской молодежи, котрых  головным орґанізатором было польске Стоваришыня Лемків. Староновым председом конґресу на далшый двойрочный період став Іван Лявинець з Мадярьска. Новов председкыньов Світового форуму русиньской молодежи ся стала Олена Стефановска з Польска, редакторка Радія Лем.фм. За підпредседів Світовой рады Русинів делеґаты  зволили Мартіна Караша, председу Русиньской оброды на Словеньску і Дюра Папуґу, председу Руськой маткы в Сербії. На пропозіцію председы делеґаты схвалили нову функцію прессекретаря – говорцю СКР, котрым ся став Петро Медвідь, шефредактор Народных новинок Інфо Русин, якый буде мати право реаґовати в пресовых аґентурах на світовы сітуації споєны з Русинами. На просьбу Лявинця делеґаты схвалили і функцію адміністратора порталу СКР, котрым ся став Петро Штефаняк, председа Округлого стола Русинів на Словеньску. Далшый 17-ый Світовый конґрес Русинів ся о два рокы одбуде в сербскім місті Новый Сад, кедь тот буде і Европскым головным містом културы. (АК)