Добровольници і містьтны жытелі, котры ся залучіли к гасічом в бою  з огньом, уж зохабили місто Ґеннаді на юговыході ґрецького острова Родос, ку котрому ся вчера у вечерніх годинах приближыли лісны пожары. Інформує о тім аґентура DPA. На найновшых заберох было видно зурівы пламіня в селі і розсяглы облакы дыму двигаючі ся к облогі. З огньом надалей бойовали професіоналны гасічі, пламіня шак захопили уж пару будов. Ґеннаді є турістами облюбене при берегах летовіско на юговыході Родосу. Обывателів евакуовали іщі в понеділок, кідь пожар ся приближував. В снажіню захранити споминане місто перед пожаром к тамтешніму гасічскому збору ся прилучіло коло 3000 добровольників і жытелів села. Позорователі але высловили страх, же тото містечко бы могло быти огньом цалком знічене.  (TASR, Pkf)