Службов Божов в ґрекокатолицькім путницькім центрі Маріуповч зачали ся ославы русиньского народного свята в Мадярьску. В рамках нього Ірині Суих-Ворінкі і нашому колеґові Петрові Медвідьові была вручена Премія Антонія Годинкы. Петро Медвідь є шефредактором русиньскых народностных новинок НН інфо Русин, редактором панрусиньского радія Радіо Лем.фм, русиньского радія Русин.фм і екстерным редактором словеньского тыжденника Тыждень. Петро Медвідь є говорця здружіння словеньскых русиньскых народностных орґанізацій Округлый стіл Русинів Словеньска. Є актoром в рамках Театрового кабарету выходняра у Пряшові. Петро Медвідь є єдным з найактівнійшых дїятелїв сучасного русиньского руху на Словеньску і вобше. Є членом Рады про нацийональны меншыны і етнічны ґрупы і по презідентскых вольбах Словеньской републікы в року 2019 быв Петро Медвідь покликаный до презідентской дорадчой рады презіденткы Зузаны Чапутовой, про народностны меншыны. (Pkf)