Ізраіль буде аж до одкликаня бойкотовати членів нововыменованой австрійской влады з правицьово популістічной Свободной партії Австрії. Докля Міністерство загранічных діл Ізраіля не переоцінить свою позіцію ку новій владі, з резортами, котры ведуть номінанты свободных, буде утримовати лем контакты на уровни урядників, пише ся подля аґентуры APA у выголошіню ізраільской амбасады у Відню, котре было публіковане в понедільок. Далше ся у выголошіню пише, же премєр і шеф діпломації Бенъямін Нетанъягу „повірив ґенералного секретаря ізраільского міністерства загранічных діл, жебы професіонално оцінив способ контактів з новов владов.“ З новым канцеларьом і шефом людовців Себастіаном Курцом буде Тел Авів утримовати прямы контакты.
(Петро Медвідь)