Чехія сі в роцї 2024 припомяне 20. юбілей членства в Европскій унії. Частёв рока ослав будуть конференції, концерты і далшы подїї, до котрых ся запоять краї, села, незісковы орґанізації, але і фірмы ці універзіты. Застрїшыть їх мотто: ,,Твориме Европу. Уж 20 років“. Лоґо і планованы подїї у четверь представив міністер про европскы залежности Мартін Двожак, інформує справодайкыня TASR в Празї. Частёв ослав буде конференція в Ліхтенштайньскім палацу, далша на Пражскім градї ці концерт Чеськой філгармонії. В календарю ослав будуть наприклад і фестівалы їдла ці квізы. ,, Вірю, же вшыткы подїї, котры будуть тот рік юбілeю жертвованы, ся стануть достойным припомянутём 20 років нашого членства в ЕУ а поможуть нам лїпше похопити значіня европской інтеґрації а зарівно нас принутять думати о будучности Европы,“ повів міністер.

(TASR, Шутіова)