Чехія собі усвідомлює вопросы повязаны с реформов юстиції в Польщі, одночасно шак нехоче ослаблювати вызнам і фунґованя вышеградской штиркы. Увів то шеф ческой дипломації Мартін Стропніцкый в Бруселі по скінчіню конференції о будучім довгодобім розрахунку Европской унії в одношіню с робочов навщівов польского премєра в Европскій комісії. Як далі повів: “Є то наісно надійный крочай, протоже говорити сполу є заклад. І мы дакотры свої проблемы хочеме тыж рішыти посередництвом робочой вечері, котра є уж договорена на кінець януаря – нашого премєра с председом комісії Юнкером. Мы сме в дость комплікованїй ситуації, кедь з єдного боку тота юстічна реформа в Польщі выкликавать вопросы а здругого боку бы сме небарз рады даякым способом ослаблювали фунґованя або вызнам того Вышеграду.“ Председа Европской комісії Жан-Клод Юнкер мав вчера вечур робочу вечеру с польскым премєром Матеузом Моравєцкім. Темов їх сполочной дебаты была головно реформа юстиції в Польщі, про котру еврокомісія ініціовала правны крокы против Польщі.
(TASR)

Фото: TASR/AP