Презідентка СР Зузана Чапутова в середу протягом розлучковой навщівы Австрії подяковала свому австрійскому колеґови Александрови Ван дер Белленови за выборну кооперацію за проходячіх пять років. Підкреслила і выборны білатералны одношіня меджі обидвома державами, інформує о тім TASR. Припомянула, же Австрія є на Словакії другым найвекшым інвестором. Добры одношіня, солідаріта і сполупраца ся подля нєй указали як ключовы головно в крізах. Чапутова подяковала Ван дер Белленови окрем сполупрацы і за штатне вызнаменаня, котре єй удїлив – Велику звізду Честного вызнаменаня за заслугы о Австрійску републіку.

(TASR, Шутіова)