Хорватьска презідентка Колінда Ґрабароба-Кітаровічова і їй сербскый колеґа Александар Вучіч в понедільок договорили ся на співпраці в інтересі змірньованя напятя меджі тыма двома державами, котре має свій початок іщі у войновім конфлікті із 90-ых років. Вучіч є од понеділька на дводньовій навщіві в Хорватії, котра є спринимана як проба о посилніня господарьскых повязань і рішіня дакілько довгодобых проблемів, котры комплікують односины меджі тыма двома державами. Сербія має інтерес зліпшыти односины з Хорватійов окрім іншого із той причіны, же бы хотіла быти членом Европской унії, што бы могла Хорватія блоковати, покля бы меджі державами зістали невырішены вопросы. Меджі них належыть і вопрос державной граніці, котров є ріка Дунай. Вучіч хоче зліпшыти односины зо судідом в слідуючіх сто днях.
(Медвідь, TASR)

Фото: TASR/AP