Премєр Фінландії Петтері Орпо жадать Европску унію, жебы нашла сполочны крокы, котры бы заборонили такзваній інштрументалізованій міґрації – волнам міґрантів приходячіх з Росії без платных паспортів. Інформує о тім аґентура Reuters, котра припомянула, же Фінландія минувшый рік заперла свою граніцю з Російов, жебы заставити роснуче чісло міґрантів з різных нестабілных країн включно Сірії і Сомалії. Гелсінкі єдночасно обвинили Москву, же міґрацію знеужывать проти Унії і Фінландії. Кремель обвиніня дементовав. Фіньска влада у віторок передложыла парламенту пропозіцію, котра бы уможнила, жебы гранічна сторож могла жадателів о азіл, котры хотять вступити до Фінландії із Росії, вертати назад на російску теріторію.

(Медвідь, TASR)