Україньскый презідент Володимир Зеленьскый у четверь заґратуловав председничцї Европской комісії Урсулї фон дер Леєновій ку зновузволїню на далшый функчный період. Подля ёго слов є Україна, як будучій член ЕУ, приготовлена актівно прыспіти ку міру, безпечности і просперітї в Европі. Европскый парламент у четверь в тайнім голосованю потвердив, же Урсула вон дер Леєнова остане председнічков Европской комісії і в другім функчнім періодї. Зо 707 голосуючіх европосланцїв здобыла 401 голосів, 284 было проти а 15 посланцїв ся стримало голосованя. Ку ґратулації председничцї ся припоїв і нїмецькый канцеларь Олаф Шолц, іспаньскый премєр Педро Санчез, польскый премєр Доналд Туск, голандьскый премєр Дік Схооф,  таліаньскый міністер загранічных дїл Антоніо Таяні і чесь кый презідент Петер Павел і премєр Петер Фіала.

(TASR, Шутіова)