Як інформує сайт Центра култур народностных меншын Закарпатя, в суботу 25-го марца 2023-го року у Виноградові одбыло ся святочне засіданя з нагоды сторічніці основаня Общества імени Александра Духновіча. Орґанізатором події было Закарпатьске областне науково-културолоґічне Общества імени Александра Духновіча. Голова общества, Юрій Продан, выступив з рефератом о історії створіня орґанізації, але і о роботі общества. Меджі далшыма выступаючіма были Юрій Шиповіч, голова Русиньского културолоґічного клубу, Євген Жупан, голова Народной рады Русинів Закарпатя, русиньскый писатель і голова районного центра общества Михаіл Чухран і далшы. На події брав участь і Олександр Лях, заступник директора одділіня – начальник управліня народностей і реліґій одділіня стратеґічных комунікацій, народностей і реліґій Областной державной адміністрації, котрый привітав участників засіданя і вручів грамоту Закарпатьскому областному науково-културолоґічному Обществу імени Александра Духновіча з нагоды сторічніці од основаня. (ЛЕМ.ФМ, Петро Медвідь)