Як інформовала пресова аґентура Рутенпрес, вночі з пятніці 3-го новембра на суботу 4-го новембра 2017-го року по тяжкій хвоторі умер в шпыталю у Вербасі во віці 57 років русиньскый новинарь, културный діятель Михайло Зазуляк. Народив ся в Руськім Керестурі 12-го апріля 1961-го року. Там жыв і робив як новинарь од 1984-го року в ґазеті „Руске слово“, oд 2010-го року быв редактором пресовой аґентуры Рутенпрес. Михайло Зазуляк быв і довгорічным співпрацовником Радіа і телевізії Новый Сад. Окрім новинарьской роботы быв і довгорічным актівістом в рамках русиньской културы. Быв членом колишнього русиньского театру „Дядя“ і сучасного Русиньского народного театру „Петро Ризнич Дядя“. В театрі діяв як актор, член веджіня, режісер і автор тлумчінь драматічных текстів. Як актора го люди знали не лем з театру, а і з радіовых пєс, котры приготовльовала русиниска редакція в Новім Саді, ці русиньскых проґрамів новосадьской телевізії. Як бывшый успішный декламатор од 1982-го року реґуларно приготовльовав декламаторів. За свою роботу в театрі і в области декламації быв нагородженый в рамках Войводины і на цілорепубліковім рівню. Од 80-ых років брав актівну участь і на творіню проґрамів про найвекшы русиньскы културны події у Войводині – фестівал „Червена ружа“, Драматічный меморіял „Петро Ризнич Дядя“, „Костельникова єшень“, но і про многы далшы події. Михайло Зазуляк діяв і в рамках Націоналного совіту Русинів, наперед як секретарь Одбору про културу, пізніше як член совіту і його културного одбору. Похороненый быв в неділю, 5-го новембра, в його роднім Руськім Керестурі.
(Петро Медвідь)