Цїлём Меджінародного дня материньского языка, котрому належыть в календарю 21. фебруар, є припомянутя, познаваня і підвышованя уровни овладаня материньскых языків на цїлїм світї, як і підкреслїня їх незаступітельной задачі при охранї културной дїдовизны. Тот день выголосила в новембру року 1999 ґенерална конференція Орґанізації ОSN про навчаня, науку і културу а од року 2000 сі го припоминать цїлый світ. Подля UNESCO єствує на світї веце як 8300 языків, ці уж в говореній або писаній подобі. З них ся все вжывать приближно 7000 языків. Зо Зрахованя жытелїв, домів і бітів в роцї 2021 выходить, же окрем словацького языка ся обчане Словацькой републікы голосать ку далшым 25 материньскым языкам. В паріжскій резіденції UNESCO ся одбуде в днях 20.-21. фебруара подїя названа ,,На языках залежыть: Ослава стріберного юбілея Меджінародного дня материньского языка”.

(TASR, Шутіова)