Перше засіданя новой ческой Посланецкой палаты скликав презідент Мілош Земан на понеділок 20. новембра. Вчера о тім інформував говорця Граду Їжі Овчачек: На засідані дають обіцяня новы посланці і зреалізує ся вольбы орґанів палаты. Земан авізував, же на скликаня засіданя выужыє максімалну леготу, котра є 30 днів. Як бы то незробив, палата ся зыйде і так, інформував сервер Новинкы.цз. Земан арґументовав тым, же на основі його інформацій ся дакотры партії приправують на обштрукції при вольбі председу палаты, без котрой неє можность учінити дальшы надвязуючі крокы. Доповнив, же тыж хоче, абы партії мали достаток часу на дискусію о орґанох палаты.
(Петро Кімак-Фейко)