В румуньскім селі Переґу-Маре проходило через вікенд засіданя членів Світовой рады Русинів (СРР), котре скликав єй председа Штефан Лявинець з Мадярьска. За Русинів Словакії быв на засіданю участный Мартін Караш, член СРР і председа Русиньской оброды на Словеньску (РОС), Петро Мікула, член културной комісії СРР і Мірон Крайковіч, член Дозорой рады РОС. Про актуалну войнову сітуацію на Україні СРР прияла выголошіня, в котрім высловлює солідарность Україні, хоць до днешнього дня Україна не признала Русинів як народность. У выголошіню ся пише, же СРР солідарізує з Русинами, як і з іншыма народностями, котры жыють на Україні. СРР і надале оставать вірна своїй місії – репрезентації русиньской ідентіты в країнах, де жыють Русины. Зато і надале жадають од влады Україны, жебы признала Русинів і їх права на основі Рамкового договору, котрый Україна підписала 1-го фебруара 1995-го року і котрый здобыв платность 1-го мая 1998-го року. СРР надале жадать, жебы План кроків рішіня проблемів Українців-Русинів приятый 7-го октобра 1996-го року і підписаный віцепремєром І. Ф. Курасом быв анулованый. (TASR, Pkf)