Естонія означіла вчерайше затриманя свого конзула в російскім Петрограді за провокацію, котра пошкоджує штатом Европской унії. Говорця естоньского міністерства заграничных справ Аарі Леммік про справодайскый портал ERR.ee повів, же “з погляду Естонії подобный інцідент лем указує, же Росія собі выбрала драгу конфронтації на мість того, абы была конштруктівна і заміряла ся на зміну неґатівных тенденцій у односинах з Европсков унійов“. Російска Федерална безпечностна служба про аґентуру Інтерфах увела, же естоньскый конзул Март Латте быв затриманый в Петрограді, кедь “собі переберав тайны документы од російского обывателя“. Леммік але увів, же Латтего затримали потім, як абсолвував робочу стрічу на універзіті в Петрограді. (TASR, Pkf)