Білорусія выголосила, же на обновліня ехпорту  чістой російской ропы через роповод Дружба будуть потрібны місяці. Москва твердить, же контамінація, котра была причінов перерушіня ехпорту,  была зроблена умыселні. Словакія, Поландія, Німецько, Україна і дальшы країны заставили імпорт російской ропы через роповод Дружба минулый тыждень, потім як прийшли на то, же ропа є контамінувана великым чіслом орґанічных хлорідів, котры можуть знищити рафінерьскы заряджіня. Шеф Transnefti Николай Токарев повів російскому презідентові Владімірові Путінові, же контамінацію нароком зробила приватна компанія в російскім реґіоні Самара. Тота неназвана компанія “зберать ропу од малых продуцентів в реґіонах Уляновск, Оренбурґ і Самара і транспортує ю до ропного сістему“, увів Токарев без того, абы ідентіфіковав фірму. (TASR, Pkf)