Бывшый премєр Каталанії і лідер сепаратістів Карлес Пуждемон пришов у понедільок до Штрасбурґу на пленарне засіданя Европского парламенту. Одсудив притім Іспанію за, подля нього, нелеґалне вязніня далшого каталаньского політіка Оріола Хункераса, інформовала аґентура AFP. На Пуждемона Іспанія выдала европскый приказ на затриманя, но тот має імуніту депутата, кедьже быв зволеный в майовых вольбах до европарламенту. Експремєр і його бывшый міністер здравотницьтва, так само евродепутат Тоні Комін, пришли до Штрасбурґу в понедільок пополідне. Хункерас, котрый быв так само зволеный, быв одсудженый в Іспанії на 13 років арешту. Пуждемон з дакілько членами свойой влады включно Коміна втекли до Белґії іщі у 2017-ім році, по референдумі о незалежности. Мадрід веде проти них карный процес.

(Медвідь, TASR)