Польска прокуратура зачала розсліджати проявы расізма і ксенофобії почас походу ултраправіцьовых націоналістів, котрый проходив 11-го новембра із нагоды Дня незалежности Польщі. Многы із 60 тісяч участных несли польскы флаґы, но дакотры і транспаренты з написами як „Біла Европа братьскых народів“. Подію одсудив Европскый парламент і польскый презідент Анджей Дуда, но дакотры членове польской влады то означіли за прояв патріотізма. Говоркыня варшавской прокуратуры Маґдалена Совова в понедільок повіла, же зачали розсліджованя із причіны „публічной пропаґації фашізма і апелів ку ненависти“ почас походу. За такы чіны горзять кары до двох років вязніці. Розсліджованя є намірено на орґанізаторів події і тых, котры несли транспаренты із образливыма написами. На поході брали участь і словацькы екстремісты.
(Петро Медбідь)