Америцькый міністер обороны Ллойд Аустін вызвав Ізраїль, абы зважыв алтернатівы к планованій теріторіялній офензиві в місті Рафаг на югу палестиньского Пасма Ґазы. Подля аґентуры  DPA ся так стало в Аустіновій в дебаті через телефон з ізраїльскым міністром обороны Йоавом Ґалантом, котрый ся одбыв в ночі на днесь. У выголошіню америцького резорту обороны ся пише, же Аустін окрім того налігав на Ґаланта, абы Ізраїль зробив веце про охрану палестиньского цівілного жытельства, забезпечів безпечность америцького армадного персоналу, котрый будує дочасный пристав на берегах Ґазы і розшырив теріторіялный транспорт гуманітарной помочі до Пасма Ґазы. (TASR, Pkf)