Папа Франціск, котрый є великым підпорователём боя проти кліматічній змінї і охраны жывотного окружіня, в середу нарядив выставбу фотоволтаічного заряджіня на покрытя енерґетічных потреб Ватікану. TASR о тім інформує подля аґентуры Reuters. Папа Франціск в особнім декретї з назвов Моту пропріо (З властной ініціатівы) выразив желаня, жебы была соларна фарма поставлена за ватіканьскыма мурами в локалітї Санта Маріа ді Ґалеріа, на северозападнім окраю Рима. Тота область з розлогов 424 гектарів належить Ватікану а находять ся там высылачі Ватіканьского розгласу, котрым буде нова соларна фарма тыж додавати електрику. В документі ся не уводить яке велике буде заряджіня, ани коли буде готове.

(TASR, Шутіова)