Тот вікенд, 12-го і 13-го октобра на Лемковині одбыли ся дві події, якы суть уж записаны як традичны акції – ХІІ Меджінародне Бієнале Лемківской / Русиньской культуры і ХХХІІ Лемківска Творча Осінь. Обідві події того року одбыли ся паралельно і тыж зачали ся в Криниці, жебы орґанізаторы завершыли вікенд в просторах Руской Бурсы в Ґорлицях. ХІІ Медженародне Бієнале Лемківской / Русиньской Культуры і ХХХІІ Лемківска Творча Осінь одбыли ся на фоні тогорічных Талергофскых Упамятнінь, у звязку зо 110-річницьов поневоліня галицькых Русинів (в тiм чiслі Русинів з Лемковины) в концентрачнім лаґері в Талергофі на теріторії днешньой Австрії. Прото  в рамках культурных проґрамів нехыбали навязаня до споминаной темы, тым веце што історія Талергофу є міцно записана в лемківскім національнім контексті. Фото: Facebook/ЛЕМ.ФМ