В найблизшый вікенд, 12-го і 13-го октобра на Лемковині одбудуть ся дві події, якы суть уж записаны як традичны акції – ХІІ Медженародне Бієнале Лемківской / Русиньской Культуры і ХХХІІ Лемківска Творча Осінь. Обідві події того року одбудуть ся паралельно і зачнуть ся тыж в Крениці, жебы орґанізаторы завершыли вікенд в просторах Руской Бурсы в Ґорлицях. ХІІ Медженародне Бієнале Лемківской / Русиньской Культуры і ХХХІІ Лемківска Творча Осінь одбудуть ся на фоні тогорічных Талергофскых Упамятнінь, у звязку зо 110-річницьов поневоліня галицькых Русинів (в тiм чiслі Русинів з Лемковины) в концентрачнім лаґері в Талергофі на теріторії днешньой Австрії. Прото  в рамках культурных проґрамів не буде бракувати навязаня до споминаной темы, тым веце што історія Талергофу є міцно записана в лемківскым національнім контексті. Фото: Facebook/ЛЕМ.ФМ (ЛЕМ.ФМ, Пкф)