Норьско запре в роцї 2023 свою послїдню углёву баню на Шпіцберґох, чім ся закончіть веце як стороча норьскых дослїджовань ложіск неростных суровин на тім арктічнім суостровю. Інформовала о тім аґентура AFP. Баня чісло 7 закончіть свій ход в септембру 2023 по тім, як уряды в головнім містї Лонґіеарбіен одступили од змлувы о засобованю містной електрарнї, інформовав у выголошіню превадзкователь банї Сторе Норске. ,,Заміром банї 7 є додавати угля до електрарнї в Лонґіеарбінї. Теперь, кедь быв договор о додавках угля зрушеный, уж не є жаден довод баню дале превадзковати,“ приближыв директор Сторе Норске Ян Мортен Ертсас. На Шпіцберґох але буде тяжба угля продовжовати і по року 2023. На суостровю пособить тотіж і російска тяжобна компанія. Москва сі тым в Арктідї утримує стратеґічну притомность, приближує аґентура AFP.

(TASR, Шутіова)