24-го апріля припоминаме собі народжіня Александра Духновіча. Тот рік то 215 річніця од народжіня будителя. Тот день выбрали собі Русины на Україні як День Русина. Русины на Підкарпатю святковали уж через вікенд. В пятніцю у Виноградові проходила подія під назвов День русиньской културы. Як інформовав портал Голос Карпат Юрій Продан, голова Закарпатьского областного науково-културолоґічного общества ім. Александра Духновіча, фестівал проходив уже шестый раз. В рамках події одбыла ся і презентація новой книжкы русиньского пистеля Михайла Чухрана під назвов Фейсбук-фіґлі. Юрій Продан вєдно із Іваном Бушком в пятніцю під памятник Духновіча у Виноградові за участи русиньской громады поклали квітя. В Мукачові в суботу проходив головный проґрам святкованя, котрый орґанізовав член Світового конґресу Русинів за Україну – Крайове общество підкарпатьскых Русинів. День Русина одбыв ся у Мукачівскім драматічнім театрі. Подія традічно почала ходом ку памятнику Духновіча, котрый стоїть в центрі міста. І в Мукачові поклали квітя ку будительові і продовжовали торжественным концертом. В рамках проґраму быв выголошеный і лавреат Літературной премії Івана Петровція, котрым тот рік став Володимір Рошко, русиньскый поет, науковець і педаґоґ.
(Медвідь)