До Сербії і Мацедонії оддыйшли вчера з Будапешті два контіґенты мадярскых поліцайтів, котры з домашніма колеґамі будуть брати участь на сполочных пограничных операціях. Дала то до відома комунікачна служба мадярской поліції на своїм інтернетовім сайті. На мацедонскых-ґрецкых границях буде єден місяць служыти 30 а на сербско-булгарскых 15 мадярскых поліцайтів. Окрім вартованя прямо на границях будуть поліцайты в інтересі потиснутя ілеґалной міґрації контролювати і дорогы на періферії границь. В державі , котра ся находить на такзвані западобалканскій міґрачній трасі служыло до днешнього дня покы 425 мадярскых поліцайтів. До Мацедонії выслали уж десять мадярскых поліцайных єдноток а до Сербії штирі.
(Петро Кімак-Фейко)