Ґенералный секретарь НАТО Єнс Столтенберґ вчера повів, же Аліанція зіставать осторожна в повязаню з подіями в Білоросії, ку котрым дішло по презідентьскых вольбах, і в припаді потребы є приготовлена хранити членьскы державы. Єдночасно уточнив, же НАТО не представлює про Білоросію жадне огрожіня, інформовала аґентура Reuters. НАТО в неділю дементовало обвиніня білоруського презідента Александра Лукашенка, подля котрых Аліанція укріплять свою воєньску присутность на граніцях з Білоросійов. Подля говоркыні НАТО в тім реґіоні не приходить ку громаджіню вояків Аліанції. За словами Оаны Лунесковой їх присутность є чісто дефензівна, адекватна і служыть на то, жебы вываровати ся конфліктам і утримовати мір. Выголошіня пришло по тім, што Лукашенко звернув увагу, же летадла і танкы НАТО были розміщены 15 минут од граніць країны.

(Медвідь, TASR)