Французьскый презідент Еммануел Макрон вєдно із брітаньскым премєром Кеіром Стармером при нагоді Дня войновых ветеранів у пондільок в Паріжі оддали честь павшым воякам в Першій світовій войні і далшых конфліктах. Стармер і Макрон наперед стрітили ся в Елізейскім палаці, пак пішли на булвар Шамп-Елізе, де положыли вінці ку гробу незнамого вояка і ку памятникам Джорджа Клеманко – французьского премєра в часі кінця Першой світовой войны, і Вінстона Чырчіла. Была то перша навщіва брітаньского премєра у Франції при нагоді закінчіня Великой войны од року 1944, кедь Шарлс де Ґол гостив Чырчіла.

(Медвідь, TASR)