На понедількове міморядне засіданя мадярьского парламенту, котре ініціовали опозічны партії з цільом штонайскоріше голосовати о вступі Швеції до НАТО, не пришли депутаты владного блоку Fidesz-KDNP. Подля сервера telex.hu так не было мож схвалити проґрам засіданя. Сервер додав, же в салі были присутны америцькый посол Дейвід Прессман, але і посол Словакії в Будапешті Павол Гамжік, а послове Голандії, Норвеґії, Данії і Польщі. Шеф амерцькой діпломації Антоні Блінкен 30-го януара высловив надію, же Мадярьско як остатній член Североатлантічной аліанції штохвіля ратіфікує вступ Швеції до НАТО. Інтернетове выданя денника Népszava в повязаню з тым пише, же Fidesz якбач не хоче закінчіти „траґікомедію“ коло вступу Швеції до НАТО.

(Медвідь, TASR)