Мадярьске міністерство културы і іновацій тот рік зась выголосує ґрант у вышцї 50 міліонів форінтів на підпору реалізації пріорітных умелецькых цїлїв професіоналных мадярьскых театрів і танечных орґанізацій в загранічу. Мадярьска влада подля выражіня міністерства поважує область културы за стратеґічный сектор, в рамках котрого підпорує роботу мадярьскых театрів і танечных орґанізацій за граніцями, котры забезпечують годноты і посилнюють народну ідентіту. Театры в рамках ґранту 2024 можуть жадати о вытворїня самостатной інсценації і о накуп технічного і явіскового выбавлїня потребного на професіоналный ход, утримованя і розвиток театра. Танечны орґанізації можуть пожадати о підпору професіоналной кооперації і стрїчу професіоналных мадярьскых фолклорных танечных ансамблїв за граніцями. На Словакії пособлять два театры, котры грають в мадярьскім языку. Єдным з них є Йокаіго театер в Комарнї а другым є Театер Тгалія в Кошіцях.

(TASR, Шутіова)