Премєр Каталанії Карлес Пуждемонт загнав іспаньскому премєрови Маріанови Рахойови писмо, в котрім жадать о продовжованя діалоґу міджі Барцелонов і Мадрідом. В писмі не дав ясну одповідь на вопрос, ці Каталанія выголосила незалежность, або ніт. Пишуть днесь о тім каталаньскы медії. Діалоґ бы подля каталаньского лідра мав проходити в слідуючіх двох місяцях і Рахоя жадать о стрічу штонайскоріше. Іспаньскый премєр на марґо писма повів, же Пуждемонт не дав поясніня односно выголошіня незалежности, о што Рахой жадав. Днесь о 10.00 год. скінчів ултіматум, котрый дав минулый тыждени Мадрід Барцелоні. Рахой в середу апеловав, жебы ся в Барцелоні ясно выразили, ці выголосили у віторок незалежность. Через вікенд іспаньскый міністер внутрічшніх діл остерігав, же за приятельну одповідь буде Мадрід брати лем „гей або ніт“. Іспаньска влада може актівовати статю конштітуції, котра возьме автономію Каталанії і Мадрід перевозьме контролю над реґіоном.
(Петро Медвідь)