Чеськый амбасадор в Кітаю Владимір Томшік в розговорі про тамтешні медії высловив політічну підпору зимным олімпійскым грам, котры будуть у фебруарі проходити в Пекіні. Діпломат так подля властных слов зробив на особный приказ од чеського презідента Мілоша Земана, котрый од нього дістав почас їх стрічі в Празі в літі. Влада Споєных штатів, а по ній і далшы западны країны выголосили „діпломатічный бойкот“ той події як протест проти порушованя людьскых прав і злочінів проти людьскости, котрых ся допущають кітайскы уряды в уйґурьскій автономній области Сін-тіян. Діпломатічный бойкот позволять участь шпортовців, але не політіків і діпломатів.

(Медвідь, TASR)