За нову предсидателику Европского парламенту депутаты днесь подля очековань выбрали евродепутатку з Малты Роберту Метсолову. Голосовало за ню 458 із 705 депутатів. Функція председы, о котру мали інтерес штирьми кандідаты, увольнила ся по минулотыждновій смерти довтогдышнього шефа европарламенту Давіда Сассолі. Інформовала о тім телевізія Euronews. Метсолова была кандідатков Европской людовой партії – найвекшой політічной фракції в Европскім парламенті. Од смерти Давіда Сассолі была дочаснов шефков европарламенту. Голосованя з причіны пандемічной сітуації проходило діштанчно.

(Медвідь, TASR)