Розсліджіня чеськой Народной централы проти орґанізованого злочіну потвердило, же за атаков на мунічны склады у Вырбєтіцях перед вісем роками стояла російска воєньска тайна служба ҐРУ. Інформовала о тім чеська Безпечностна інформачна служба. Першый склад у Вырбєтіцях выбухнув у октобрі, другый у децембрі 2014-го року. При першім вмерло двоє людей. Склады мала в аренді остравска фірма Imer Group. Подля чеського міністра внутрішніх діл Віта Ракушана є доказане, же за выбухами суть членове ҐРУ. Їх мотівом подля міністра было заборонити доданю зброї до областей, де російска армія выконовала свої операції. Розсліджіня было „екстремно складне“, цітовав міністра сервер iDnes.cz.

(Медвідь, TASR)