Днешнім дньом зачінать в столиці сербской Войводины – Новім Саді – XVII. Світовый конґрес Русинів (СКР). Участників днесь чекать културный проґрам – выстава малярьскых творів Влада Няраді в ґалерії Културного центра Войводины Мілош Цырнянскі і поетічна стріча, в рамках котрой одпрезентують ся поеты і поеткы з членьскых держав СКР вєдно з домашніма русиньскыма творцями поезії. Завтра, 18-авґуста, одбуде ся святочне одкрытя XVII. Світового конґресу Русинів в просторах Філозофічной факулты Універзіты в Новім Саді. На тот день є
наплановане по святочных приговорах і выголошіня лавреатів Премії Василя Турока-Гетеша i Націоналной премії за русиньске уменя імени Івана Манайла Pro Arte Ruthenorum. Пак вже буде конґрес продовжовати 1-ым пленарным засіданьом, в рамках котрого будуть прочітаны справы о діятельности за рокы 2021 – 2023 од председы конґресу, представителів
членьскых орґанізацій із окремых держав, як і од ревізійной комісії. На пополідне першого робочого дня є наплановане засіданя ХI. Світового форуму русиньской молодежи, як і робота по окремых комісіях СКР. У вечорных годинах участників чекать театралне преставліня на русиньскім языку, а Світова рада Русинів буде в тот вечур мати своє друге конґресове засіданя. В тот день проґрам конґресу буде збогаченый і о Меджінародну научно-фахову конференцію під назвов Світова русиністіка днесь і в будучности. В суботу 19-го авґуста одбуде ся другый робочій день XVII. Світового конґресу Русинів на котрім ся окрім іншого одбуде вольба нового председу СКР,  буде приятя Резолуції XVII. Світового конґресу Русинів, і  потвердить ся місце засіданя XVIIІ. Світового конґресу Русинів, котре одбуде ся за далшы два рокы. (ЛЕМ.ФМ, Пкф)