Вчера вечур коло 19.00 год. великый пожар захопив парізькый собор Notre-Dame. Гасічам ся подарило почас ночі дістати огень під контролю і є часточно загашеный. Дві головны вежи суть подля гасічів уратованы і сохранены, стріха є зничена. Подля парізькой прокуратуры є натеперь вылучена можливость підпалячства включно терорістічных мотівів. Пожар міг выникнути в повязаню із реконштрукчныма роботами, котры там проходили. Французькый презідент Емануел Макрон приобіцяв, же храм буде зреконштруованый. „Вєдно знова выбудуєме Notre-Dame,“ выголосив перед пошкодженов катедралов в ночі шеф Елізейского палаца і додав, же спустить цілонародну збірку. Озвав ся і французькый міліардарь Франсоа-Анрі Піно, котрый приобіцяв дати 100 міліонів евр на реновацію славного Собору Божой Матери.

(Медвідь, TASR)