Понад 2000 віруючіх, представителі властей, діпломатічных місій, десяткы єпіскопів із цілого світа, множество священиків – тоты вшыткы зышли ся вчера 16-го юла 2024-го року в Хрествоздвиженьскім ґрекокатолицькім катедралнім соборі в Ужгороді, жебы брати участь на великім торжестві Мукачовской ґрекокатолицькой єпархії. В тот день, коли єпархія припоминать собі свято Чудотворной Іконы Мукачовской Пресвятой Богородіці, быв рукоположеный і інтронізованый на єпіскопскый столець новый мукачовскый єпарха – Преосвященый владыка Теодор Мацапула. Папа римскый Франціск призначів владыку Теодора за мукачовского єпарху 8-го мая 2024-го року. Матірь Церьков про наслідників Ужгородьской унії, русиньской традіції, має од того дня нового правлячого єпіскопа. Джерело фотоґрафії: Facebook/ЛЕМ.ФМ (ЛЕМ.ФМ, Пкф)