Днесь 25-го фебруара зачне в румуньскім селі Переґу-Маре засіданя членів Світовой рады Русинів (СРР), котре скликав єй председа Штефан Лявинець з Мадярьска. Членами Світовой рады Русинів суть представителі русиньскых орґанізацій Европы – Словакії, Чех, Польской републікы, Мадярьска, Сербії, Хорватії, Румунії, Україны, але і Споєных штатів Америкы і Канады. За Русинів Словакії будуть на засіданю  участны Мартін Караш, член Світовой рады Русинів  і председа Русиньской оброды на Словеньску (РОС), Петро Мікула, член културной комісії СРР і Мірон Крайковіч, член Дозорной рады РОС. Про войнову сітуацію і заказ выходжаня з Україны мужів од 18 до 60 років не буде на засіданю участный Микола Бобинець, член СРР за Україну. Окрем днешнього засіданя рады, на суботу і неділю румуньскы Русины приготовили богатый проґрам, котрый зачне в суботу положіньом вінців ку новому памятнику Александра Духновіча і выступлінями русиньскых ґруп. В неділю ся одбуде свята літурґія, котру буде одправляти отець Василій Бойчук. Цілый проґрам буде присвяченый Дню Русинів Румунії. 

(А. Кузмякова)