В презідентьскій резіденції в польскій Віслі в понедільок одбыв ся презідентьскый саміт країн V4. На запрошіня польского презідента Анджея Дуды до Віслы пришли словацькый презідент Петер Пеллеґріні, чеськый презідент Петр Павел і мадярьскый презідент Тамаш Шуйок, інформує аґентура TASR. Головы штирьох держав діскутовали о актуалных вопросах реґіону, Европской унії і о ґлобалній сітуації. По саміті одбыла ся пресова конференція, на котрій познакомили новинарів із резултатами стрічі. Подля чеського презідента Петра Павла ся головы держав згодли на тім, же хотять, жебы на Україні быв мір. Але як повів на пресконференції, вопросом подля нього є, якый бы быв і за яку ціну бы до нього дішло.

(Медвідь, TASR)