Як ЛЕМ.ФМ – радіо Руской Бурзы вже інформовало скоріше, тот рік собі ґрекокатолици русиньской традіції в Споєных штатах Америкы припоминають сто років, одколи здобыли свою першу церьковну штруктуру і выникнув екзархат – попередник днешньой Піттсбурзьской архієпархії і Митрополітной церькви. 8-го мая 1924-го року быв Святішым Престолом зрядженый Піттсбурзьскый апостольскый екзархат про Русинів. Папа римскый Пій XI. за першого екзарху про Русинів у Споєных штатах Америкы призначів Василя Такача. Єпіскопску хіротонію, родак із села Вучково на Підкарпатю, прияв у Римі 8-го юна того самого року. Владыка Такач пришов до Ню-Йорку 13-го авґуста 1924-го року і одслужыв Дяковный молебен на Мангаттані, в Церькви Пречістой Дівы Марії. Тоту сторічніцю теперь припомянуть собі в Церькви Пречістой Дівы Марії в Ню-Йорку, котра была збудована пізніше. Памятна подія буде проходити якраз 13-го авґуста 2024-го року, і почне семінаром, в рамках котрого отець Хрістофер Зуґґер – історік, буде бісідовати о приході і ряджіню владыкы Такача у втогдышнім нововыникнутім екзархаті. Пак буде одслуженый, як перед сто роками, Дяковный молебен, котрый одправляти буде владыка Курт Бурнетт, єпарха в Пассаіку, вєдно з домашніма священиками. Жрідло фотоґрафії: Facebook/ЛЕМ.ФМ (ЛЕМ.ФМ, Пкф)