У світознамій катедралі Нотр-Дам в Паріжі в неділю одбыла ся омша присвячена жертвам атаків ісламскых екстремістів із четверьга в іспаньскій Барцелоні. На омші споминали і на жертвы далшых атаків і природных катастроф того літа по цілім світі. Парізькый архієпіскоп і кардінал Андре Вінь-Троа повів, же нанещастя знать, як барз тоты убийства травматізують ціле жытельство і же присутность церькви може каждому помочі звладнути тоту складну пробу.
(Петро Медвідь)