Приблизно 30 тісяч людей вчера у великобрітаньскім Менчестрі вышло до уліць, жебы протестовати проти влады премєркы Терезы Мейовой і проти брексіта. В місті проходили дві окремы демонштрації в день, коли там зачав сейм Конзерватівной партії, котрый буде проходити аж до середы. Премєрка Мейова на зачатку сейму партії выразила жаль над слабыма резултатами конзерватівців в передчасных выборах, котры сама выголосила, жебы здобыти мандат на выїднаваня брексіту. По выборах Мейова веде меншынову владу, чім собі сітуацію згіршыла. Люди в уліцях окрем брексіту протестовали і проти шпоровливій політіці Мейовой влады, інфомровала аґентура TASR.
(Петро Медвідь)