Бібліотека Русинів Мадярьска імени професора Іштвана Удварі в Будапешті, котра тот рік святкує 20-ый юбілей свого основаня, орґанізує у своїх просторах завтра 12-го септембра 2024-го року памятну конференцію на честь професора, по котрім має свою назву. На конференції будуть брати участь Віктор Крамаренко – председа Вседержавного русиньского самосправованя, під котре бібліотека належыть, і Віра Ґіріц – посланкыня за Русинів у Парламенті Мадярьска. Академік Іштван Удварі (14. юла 1950 р. – 9. новембра 2005 р.)  окрім іншого од 1982-го року выкладав російскый, україньскый і русиньскый язык на Высшій педаґоґічній школі в Ніредьгазі, де у 1992-ім році засновав Катедру україньской і русиньской філолоґії, яка фунґовала до року 2013, пізніше была обновлена лем україністіка. Інтересовав ся аналізов русиньскых текстів, головно тых, котры односны суть ку періоду до 19-го столітя, і котры ся му подарило найти в мадярьскых архівах. Тыж приготовив до друку дакілько томів рукописів русиньского історіка Антонія Годинкы, репрітны выдань букваря Мануіла Ольшавского, букваря Іоанна Куткы і много далшых. Так само працовав над языком і літературов Русинів Войводины. Фото: Facebook/ Лем.фм(ЛЕМ.ФМ, Пкф)