В неділю  в ґрецкім головнім місті Атены ся одбыли протестны мітінґы против планованій зміні назвы країны сусідной Мацедонії. Інформує о тім пресова аґентура АП. По тім, як  скоро 30 молодых людей попробувало собі вынутити запертя будинку парламенту шмаряням каміня, одповідала порядкова поліція поужытям слызутворного пліну на розогнатя демонштрантів. Стовкы автобусів, головно зо северу країны, приважали участників на демонштрацію, котра ся одбыла  на площадкі Сінтаґма при будинку парламенту. Поліція одгадує, же демонштрантів было коло 60.000, покы орґанізаторы говорять о чіслі 100.000.