Як інформовав офіціалный сайт Мукачовской ґрекокатолицькой єпархії, 19-го децембра 2024-го року Дікастерія у справах вызнаня святых інформовала о даті і місцю святочной беатіфікації – выголошіня за блаженого, отця Петра Павла Ороса. Слуга Божый Петро Павел Орос (рр. 1917 – 1953) быв священиком Мукачовской ґрекокатолицькой єпархії, якый быв убитый совітьскым міліціонарьом. Святочна беатіфікація одбуде ся 3-го мая 2025-го року в селі Білкы на Підкарпатю. Якраз село Білкы было про отця Петра Павла Ороса послідньов офіціалнов парохійов, на котрій служыв перед ліквідаційов Мукачовской ґрекокатолицькой єпархії комуністічныма властями. Інтересным фактом є і то, же Діккастерія у справах про вызнаня святых того оголосила 19-го децембра. В тот день у 1944-ім році мав подля свідоцтва отця Стефана Бендаса блаженый священомученик Теодор Ромжа, єпіскоп мукачовскый, тайно рукоположыти отця Ороса на єпіскопа. Джерело фотоґрафії: Facebook/ЛЕМ.ФМ (ЛЕМ.ФМ, Пкф)