Чеськый презідент Мілош Земан в понедільок знову выразив підпору премєрови Андрейови Бабішови в актуалній кавзі Čapí hnízdo і можливого завлечіня Бабішового сына на Крым. В припаді паду влады презідент Бабіша знову повірить зоставліньом кабінету, інформовав вчера портал Novinky.cz з одкликаньом ся на Бабішовы слова по вечері зо Земаном на замку в Ланах. Меншынову владу партій ANO і ČSSD, котру толерують комуністы, чекать в пятніцю голосованя о недовірі. Тоту хоче выразити шість опозічный партій. Довєдна мають 92 голосів, про высловліня недовіры є потрібных 101 голосів. Залежати буде на голосованю коалічных соціалных демократів і комуністів.
(Медвідь, TASR)