Ізраїльскый премєрь Бенямін Нетанягу розпустив шістьчленный войновый кабінет. Увів то днесь ізраїльскый справодайскый портал The Times of Israel (TOI) з одкликаням ся на Нетанягову канцеларію. Подля аґентуры Reuters іде о очікованый крок по одході Бенниго Ґанца, міністра войнового кабінету, з ізраїльской влады. Портал The Times of Israel у своїй справі увів, же Нетанягу ознамив офіціалне розпущіня войнового кабінету в неділю вечурь. Войновый кабінет быв вытвореный 11-го октобра – штирї дні по безпрецедентнім атаку палестиньскых команд на югу Ізраїля – з цільом керувати тяжіня проти мілітантным рухом Гамас в Пасмі Ґазы і Гізбаллаг в Лібаноні. (TASR, Pkf)