Председа Европской рады Шарлс Мішел в понедільок стрітив ся в Будапешті з председом мадярьской влады Віктором Орбаном. Стріча одбыла ся в рамках намаг о змірніня напруг в часі, коли Мадярьско грозить, же заблокує ключовы рішіня Унії о Україні, пише аґентура AFP. Орбан, єдиный лідер в Европскій унії, котрый собі утримав близкы звязы з Кремльом, погрозив, же схоснує право вета на децембровім саміті і заблокує поміч Унії про Україну, а так само заставить намагы Києва стати членом евроблоку. Мадярьскый премєр веде з Унійов споры в многых вопросах од міґрації, реформы юстіції аж по Україну. Найновіше в Мадярьску проходить евроскептічна плаґатова кампань, котра є заміряна проти предсидателькы Европской комісії Урсулы вон дер Леєновой.

(Медвідь, TASR)