Як інформовав портал Illinois News Bureau, 18-го септембра 2022-го року вмер у віці 93 років в місті Урбана, в штаті Ілліноіс (США) Нік Голоняк, професор Універзіты в Ілліноіс в Урбана-Шампань. Вызначный ученый, котрому вдячіме за технолоґію LED, быв сыном русиньскых еміґрантів із Підкарпатя. Нік Голоняк народив ся 3-го новембра 1928-го року в Зеіґлері, Ілліноіс. Як сам повів у єднім з інтервю, його няньо з Підкарпатя, втогды іщі в Угорьску, до Споєных штатів Америкы, пришов в році 1909, мама в році 1921, значіть в часі, коли уж была Підкарпатьска Русь в складі Чехословакії.Професор Нік Голоняку 1960-ім році створив першый половодічовый ласер, о два рокы пізніше першу LED – світло емітуючу діоду, уж як конзултант General Electric. У 1963-ім році вернув на Універзіту в Ілліноіс, де передтым штудовав, але уж як професор і робив на квантовій теорії волн і на ласері. У 1989-ім році здобыв Едісонову медайлу „За міморядну карьєру в области електротехнікы і вклад до вызначного зліпшіня в области половодічів і пристроїв“. У 1995-ім році быв оціненый Японьсков премійов „За вызнанчый вклад до баданя практічной аплікації LED і ласерів“. У 2003-ім році быв нагородженый Інштітутом електричных і електронічных інжінірів, котрый му уділив Медайлу чести. Жрідло фотоґрафії: Wikipedia.  (ЛЕМ.ФМ, Pkf)