Як інформовав Святішый Престол на своїм офіціалнім вебсайті, Святішый Отець Франціск призначів 21-го новембра 2024-го року, на праздник Входу Пресвятой Богородіці до Храму, Преосвященого владыку Мілана Лаха за апостольского візітатора про словацькых ґрекатолицькых віруючіх в западній Европі. Преосвященый Мілан вєдно з новов функційов зістає і помічным єпіскопом Братіславской єпархії. Апостолсьскый візітатор є делеґатом Папы Римского, векшынов на посаді єпіскопа. Має уділены особливы, шырокы уповномочіня і одповідный є лем перед Вселеньскым Архієрейом. Окрім іншого выконує обоязкы єпіскопа в єпархії, де не є єпіскопа, або про віруючіх, якы не належать під даяку теріторіално выділену єпархію. Джерело фотоґрафії: ЛЕМ.ФМ/Facebook (ЛЕМ.ФМ, Пкф)